ក្រុមឧទ្ទាមតាលីបង់បាននិយាយកាលពីថ្ងៃចន្ទថាខ្លួនតាំងចិត្តសម្លាប់ព្រះអង្គម្ចាស់ហារីរបស់អង់គ្លេសដែលកំពុងបំពេញបេសកកម្មនៅអាហ្វហ្គានីស្ថាន នៅ៤ឆ្នាំបន្ទាប់ពីការបំពេញភារកិច្ចយោធារបស់ព្រះអង្គនៅអាហ្វហ្គានីស្ថានត្រូវបានកាត់បន្ថយដោយសារការព្រួយបារម្ភអំពីសន្តិសុខ។
អ្នកនាំពាក្យក្រុមឧទ្ទាមនេះបាននិយាយថាក្រុមខ្លួនមាន"ផែនការតម្លៃខ្ពស់"មួយដើម្បីវាយប្រហារលើរាជទាយាទលំដាប់ទី៣នៃរាជបល័ង្កអង់គ្លេសនៅក្នុងខេត្តហេលម៉ាន់ភាគខាងត្បូង។
អ្នកនាំពាក្យបានបន្ថែមថា"យើងនឹងធ្វើអ្វីគ្រប់យ៉ាងដែលអាចដើម្បីសម្លាប់ព្រះអង្គម្ចាស់ហារីនិងទាហានអង់គ្លេសនៅហេលម៉ាន់។វាមិនសំខាន់ទេក្នុងការចាប់ពង្រត់រូបគេ យើងនឹងផ្តោតលើគាត់និងសម្លាប់គាត់"។
អាកាសយានិកឧទ្ធម្ភាគចក្រApacheវ័យ២៧ឆ្នាំរូបនេះនឹងចំណាយពេល៤ខែនៅជំរំCamp Bastionក្នុងខេត្តហេលម៉ាន់។
ក្នុងពេលជាមួយគ្នាមានព័ត៌មានថាពួកមេដឹកនាំតាលីបង់ខ្លះត្រៀមចរចាបង្កើតកិច្ចព្រមព្រៀងសន្តិភាពលម្អិតមួយពាក់ព័ន្ធនឹងវត្តមានយោធាអាមេរិកយូរអង្វែងនៅអាហ្វហ្គានីស្ថាន តែនឹងមិនទទួលរដ្ឋាភិបាលរបស់លោកហាមីត កាហ្សៃទេ។
យោងតាមរបាយការណ៍មួយដែលចេញផ្សាយដោយវិទ្យាស្ថានRoyal United Services Institute (RUSI) កាសែតthe Guardianរបស់អង់គ្លេសបាននិយាយថាក្រុមតាលីបង់ប្តេជ្ញាផ្តាច់ខ្លួនចេញពីក្រុមភេរវកម្មអាល់ កៃដាជាផ្នែកនៃដំណោះស្រាយមួយនិងបើកទ្វារចំហចំពោះការចរចាអំពីការអប់រំសំរាប់ស្ត្រី៕
0 comments:
Post a Comment